Հայաստանում ավելացել են ընտանիքի անդամների` մեկը մյուսին սպանելու դեպքերը

Վերջին շրջանում Հայաստանում ավելացել են ընտանիքի անդամների` մեկը մյուսին սպանելու դեպքերը. լրագրողների հետ հանդիպման ժամանակ ասաց իրավաբան, հոգեբան Արկադի Մեհրաբյանը:

Ըստ նրա` սպանությունների թվի աճը, առհասարակ, ագրեսիայի ավելացումից է: «Ընտանիքի անդամներին սպանելը իրավագիտակցության` ցածր լինելու հետևանք է, նրանք ուղղակի չեն գիտակցում` ինչ պատիժ է հետո իրենց սպասվում: Բացի այդ` նախկինում հստակ էր ընտանիքի մոդելը, իսկ հիմա արժեհամակարգը խախտվել է»,- ասաց Մեհրաբյանը` հավելելով, որ ցենզուրայի բացակայությունն էլ իր դերն ունի այստեղ, քանի որ օբյեկտիվ ճշմարտության գաղափարը կորել է:

Մասնագետի հավաստմամբ` սպանության տանում է նաև ինքնահաստատվելու ցանկությունը, այսինքն` բռնության միջոցով ուժը ցույց տալու ցանկությունը: Ըստ Մեհրաբյանի` սպանության դիմելու ամենատարածված պատճառներն են` խանդը, նախանձն ու շահը: