Սեյրան Օհանյանը սահմանին տիրող իրավիճակի կապակցությամբ աղաղակելու պատճառ չի տեսնում

ՀՀ պաշտպանության նախարար Սեյրան Օհանյանն այսօր խորհրդարանում լրագրողներին ասաց, որ ՀԱՊԿ գագաթաժողովում բարձրացվել են սահմանային լարվածության հետ կապված բոլոր հարցերը: «Այն խնդիրները, որոնք այսօր առօրյայում դրված են ՀՀ զինված ուժերի առջև, ինչպես միշտ` լիարժեք կատարում ենք: Չեմ կարծում, որ առօրյա նման խախտումների համար պետք է ձայն բարձրացնել, աղաղակել: Եթե այդպիսի փոքր խնդիրներին էլ մեր զինված ուժերն ի վիճակի չեն պատասխանել, մեծ պաշպանության իրականացման ժամանակ ինչպե՞ս ենք գործելու», - նշեց նախարարը` հավելելով, որ իրենք իրենց առջև դրված խնդիրներն այսօր իրականացնում են:

Սեյրան Օհանյանի բնորոշմամբ` հակառակորդի կողմից իրականացված գործողություններին հայկական կողմը տալիս է ադեկվատ պատասխան: