Կառավարության անվտանգությունն ապահովող աշխատակիցը գիտակցության է եկել

Սեպտեմբերի 7-ին առավոտյան կառավարության շենքի հետնամուտքում ինքն իրեն հրազենային վնասվածք պատճառած Լյուդվիգ Հովհաննիսյանը գիտակցության է եկել: Այս մասին yerkir.am-ին ասաց թիվ 1 համալսարանական հիվանդանոցի գլխավոր բժիշկ Կարեն Սահակյանը:

Հիշեցնենք, որ Հովհաննիսյանը վնասվածք էր ստացել գլխի շրջանում և ծանր վիրահատությունից հետո գտնվում էր հիվանդանոցի վերակենդանացման բաժանմունքում:

Բժշկի խոսքով՝ հիվանդի մոտ դրական  տեղաշարժ է նկատվում, արհեստական շնչառության ապարատն անջատված է, սակայն հիվանդասենյակ տեղափոխելու մասին վաղ է խոսել:

Հիշեցնենք, որ հրազենային վնասվածք ստացած Լյուդվիգ Հովհաննիսյանը ԱԱԾ՝ պետական օբյեկտների պահպանության վարչության աշխատակից է:

Դեպքի առթիվ ՀՀ քննչական կոմիտեի Երևան քաղաքի Կենտրոն և Նորք-Մարաշ վարչական շրջանների քննչական բաժնում հարուցվել է քրեական գործ` ՀՀ քրեական գործ Քրեական օրենսգրքի 110-րդ հոդվածի 1-ին մասով (սպառնալիքի, դաժան վերաբերմունքի կամ անձնական արժանապատվությունը պարբերաբար նվաստացնելու ճանապարհով անձին անուղղակի դիտավորությամբ կամ անզգուշությամբ ինքնասպանության կամ ինքնասպանության փորձի հասցնելը):