Վանաձորում դանակահարված դպրոցականը գիտակցության չի եկել

Վանաձորի թիվ 24 միջնակարգ դպրոցի բակում տեղի ունեցած դանակահարության հետևանքով հիվանդանոց տեղափոխված` 17-ամյա Տիգրան Գևորգյանի վիճակը շարունակում է մնալ ծանր: Այս մասին yerkir.am-ին հայտնեց «Էրեբունի» բժշկական կենտրոնի մամլո պատասխանատու Շուշան Հունանյանը: Նա նշեց, որ հիվանդը շարունակում է մնալ վերակենդանացման բաժանմունքում, դեռևս գիտակցության չի եկել, միացված է արհեստական շնչառության սարք:

Հիշեցնենք, որ փաստի առթիվ ՀՀ Քննչական կոմիտեի Լոռու մարզային բաժնում հարուցվել է քրեական գործ ՝ ՀՀ քրեական օրենսգրքի 112-րդ հոդվածի հատկանիշներով: Դեպքի օրը` երեկոյան քննչական բաժին է ներկայացած առերևույթ հանցագործություն կատարած անձը` 1997 թ. ծնված Նարեկ Ա.-ն, և խոստովանել, որ դեկտեմբերի 2-ին` ժամը 14.00-ի սահմաններում, Վանաձոր քաղաքի Ներսիսյան փողոցի թիվ 6 հասցեի մոտ, վիճաբանության ժամանակ, ինքն է դանակով հարվածել Տիգրան Գ.-ին և Ռոբերտ Պ.-ին` պատճառելով մարմնական վնասվածքներ: