Սերժ Սարգսյանի նոր խոսնակի մեկնաբանությունն իր անվան շուրջ պտտվող խոսակցությունների մասին. Past.am

Ըստ past.am-ի` նախագահի նոր մամուլի խոսնակի նշանակումը տարաբնույթ մեկնաբանությունների պատճառ հանդիսացավ: Այդ մեկնաբանությունները կապված էին ԱԱԾ-ում Վլադիմիր Հակոբյանի աշխատանքի հետ:

Հիշատակվեց նաև նախորդ տարվա աղմկահարույց միջադեպը Վլադիմիր Հակոբյանի և լրագրող, «Ժառանգություն» կուսակցության վարչության անդամ Հրայր Մանուկյանի միջև: Հրայր Մանուկյանը նշում է, որ Վլադիմիր Հակոբյանն իրեն սպառնալու և անհաջող հավաքագրման փորձից հետո չպետք է այդ պաշտոնը ստանար:

Հարցի վերաբերյալ Past.am-ը մեկնաբանություն ստացավ նորանշանակ մամուլի քարտուղարից, ով մասնավորապես նշեց. «Տեղեկացնեմ, որ ՀՀ Ազգային անվտանգության ծառայությունում աշխատելիս մշտապես գործել եմ ՀՀ օրենսդրության և գերատեսչական նորմատիվ ակտերի պահանջներին համապատասխան` աշխատանքային և մասնագիտական առանձնահատկություններով պայմանավորված: Ձեր հարցի հետ կապված` առավել մանրամասն մեկնաբանություն տրամադրել չեմ կարող»:

Հիշեցնենք, որ նախագահի` հուլիսի 18-ի հրամանագրով Արման Սաղաթելյանն ազատվել էր ՀՀ նախագահի մամուլի խոսնակի պաշտոնից: Նախագահի մեկ այլ հրամանագրով ՀՀ նախագահի մամուլի քարտուղար էր նշանակվել Վլադիմիր Հակոբյանը: