«Ոչ թալանին» նախաձեռնության անդամները չեն ճանաչում Բաղրամյան պողոտայի այսօրվա «լիդերներին»

Այսօր լրագրողների հետ զրույցում «Ոչ թալանին» նախաձեռնության անդամ Վաղինակ Շուշանյանը պարզաբանեց իր այն հայտարարությունը, որ` ով չի գնում Ազատության հրապարակ, սադրիչ է: Նա ասաց, որ հունիսի 28-ի իր այդ հայտարարությունը վերաբերել է այն մարդկանց, ովքեր սկսել են սուլել, աղաղակել այն ժամանակ, երբ անգամ հայտարարության տեքստը չէր ընթերցել:

Նախաձեռնության անդամներից Արթուր Քոչարյանն ասաց, որ Վաղինակի խոսքի ժամանակ Բաղրամյան պողոտայում շարունակ «ամոթ» վանկարկողներին չեն ճանաչում: Պարզվում է՝ ակտիվիստները չեն ճանաչում նաեւ նրանց, ովքեր այսօր Բաղրամյան պողոտայում միկրոֆոններն իրենց ձեռքն են վերցրել եւ անգամ ՀԾԿՀ-ն ՀԷՑ-ից չեն տարբերում:

Երիտասարդները եւս մեկ անգամ ընդգծեցին, որ իրենց պահանջները տեղ են հասել, բայց լուծում չեն ստացել: Նախաձեռնության անդամներից Սոֆյա Հովսեփյանը հայտարարեց. «Մենք հաղթանակ չունենք, բայց ստիպել ենք իշխանություններին կես քայլ հետ գնալ»:

Ի դեպ, այսօր երիտասարդները հանդիպելու են տնտեսագետների եւ իրավաբանների հետ: