Ադրբեջանի ԱԳՆ-ն խոսել է Եվրախորհրդից դուրս գալու մասին

Եվրախորհրդի Խորհրդարանական վեհաժողովի կողմից հունիսի 23-ին ընդունված` «Ադրբեջանում ժողովրդավարական ինստիտուտների գործունեություն» վերնագրված բանաձևը Բաքվի նկատմամբ կողմնապահ և չհիմնավորված մոտեցման ևս մեկ օրինակ է: Այդ մասին հայտարարել է Ադրբեջանի ԱԳՆ-ն. հայտնում է contact.az-ը:

«Ադրբեջանում ակնհայտ է քաղաքական կայունությունը, տնտեսական զարգացումը, սոցիալական բարեկեցությունն ու քաղաքացիական հասարակության ազատությունն ու խոսքի ազատությունը: Ադրբեջանի բոլոր ձեռքբերումները մեկ նպատակ ունեն՝ ապահովել ադրբեջանցի ժողովրդի շահերը, այլ ոչ թե ինչ-որ միջազգային կառույցի հավանությանն արժանանալ»,- ասել է ԱԳՆ-ն։

Ադրբեջանի ԱԳՆ-ն համարում է, որ կողմնապահ վերաբերմունքն ու երկակի չափանիշները մտածելու տեղիք են տալիս՝ որքանո՞վ է անհրաժեշտ Բաքվի մասնակցությունը Եվրոպայի խորհրդին ու նրա Խորհրդարանական վեհաժողովին։