Չմտածեք, որ «կակոյ նիբուձ» բիբիններով իրավիճակը կփոխվի. Վարդան Բոստանջյան

Այսօր լրագրողների հետ հանդիպման ընթացքում տնտեսագետ Վարդան Բոստանջյանն անդրադարձավ էլեկտրաէներգիայի սակագնի բարձրացման պատճառներին ու հետևանքներին:

Նրա խոսքով` ունեցանք այն, ինչ ունեցանք: «Սա ծրագրած սցենար էր. 17 դրամից հետո կդարձնենք 7 դրամ, և սրանով ժողովուրդը կուրախանա: Ինչպես ասում է Հանրային ծառայությունները կարգավորող հանձնաժողովի նախագահ Ռոբերտ Նազարյանը` 2015 թվականին էլեկտրաէներիայի սակագինը կիջնի և կհասնի հինգ դրամի: Այսօրվանից, փաստորեն, երազներով ապրենք»,- ասաց Բոստանջյանը` հավելելով. «Տնտեսական հարցերի հանձնաժողովի նախագահն անգամ ասաց, որ դժվար է ամբողջությամբ վերահսկել իրավիճակը: Մեր էներգահամակարգը պարզապես ողորմելի վիճակում է»:

«Բիբին չկա, իշխանությունն ինքն է բստրել Բիբինին: Չմտածեք, որ «կակոյ նիբուձ» բիբիններով իրավիճակը կփոխվի: Բոլոր դեպքերում գոյություն ունի ապաշնորհ կառավարում: Բիբինը եկել է իմ տուն, փչացնում է իմ տունը, բայց ո՞ւր էինք մենք, ավելի կոնկրետ` ՀՀ իշխանությունը, երբ նրան ավերիչ գործունեության երաշխիքներ էր տալիս»,- բարկացած հայտարարեց տնտեսագետը: