Էպիլեպսիայով հիվանդ տղամարդուն ծեծի ենթարկելու վերաբերյալ բացատրություն է տվել Ճոյտի որդին

Էջմիածին քաղաքի 38-ամյա բնակիչ Պարույր Թորոյանի հաղորդման հիման վրա ոստիկանության Վաղարշապատի բաժնում նախապատրաստված նյութերն ուղարկվել են ՀՀ քննչական կոմիտե: Այս մասին yerkir.am-ին հայտնեցին ՀՀ ոստիկանությունից:

Հիշեցնենք, որ հունիսի 6-ին Վաղարշապատի հիվանդանոցից ոստիկանության Վաղարշապատի բաժին հայտնել են, որ «գլխուղեղի ցնցում» ախտորոշմամբ իրենց մոտ բուժօգնության է տեղափոխվել մի երիտասարդ, ով հայտնել է, որ նախորդ օրը Զվարթնոց թաղամասից դեպի Նորակերտ գյուղ ընկած ճանապարհահատվածում վիճաբանություն է տեղի ունեցել իր և 52-ամյա Հակոբ Հակոբյանի (Ճոյտ) ու 22-ամյա Արայիկ Հակոբյանի միջև, որի ժամանակ Հակոբյանները ծեծի են ենթարկել իրեն: Դեպքից հետո Վաղարշապատի բաժին է ներկայացել Հակոբ Հակոբյանը և կատարվածի վերաբերյալ բացատրություն տվել:

Ոստիկանությունից yerkir.am-ին հայտնեցին, որ հետաքննության ընթացքում Վաղարշաբատի բաժին է ներկայացել և բացատրություն տվել նաև Հակոբյանի որդին՝ Արայիկ Հակոբյանը:

Նշենք, որ Հակոբ Հակոբյանը հերքել էր իր և որդու կողմից հիշյալ անձին ծեծի ենթարկելու հանգամանքը՝ նշելով, որ այդ տղամարդն էպիլեպսիայով հիվանդ է, և իրենք ընդամենը օգնել են նրան: