Ես հասկանում եմ բոլոր ցուցարարներին. Երվանդ Զախարյան

Այսօր Սարդարապատի հուշահամալիրում լրագրողները էներգետիկայի և բնական պաշարների նախարար Երվանդ Զախարյանին հարցեր ուղղեցին էլեկտրաէներգիայի սակագնի թանկացման վերաբերյալ:

«Էլեկտրաէներգիայի սակագնի բարձրացումը ցանկալի չէ ոչ մեկին, եւ դրանով զբաղվելն էլ հաճելի աշխատանք չէ: Կան իրավիճակներ, որոնցից ելնելով` ստիպված ես որոշակի քայլերի դիմել, կան հարցեր, որոնք լուծում են պահանջում, եւ այդ հարցերից մեկն էլ հոսանքի թանկացումն է: Ես հասկանում եմ բոլոր ցուցարարներին, որոնք ունեն դժգոհություն, սա իսկապես սոցիալական խնդիր է, որն անհանգստացնում է մեր քաղաքացիներին:

Այս պահին ուսումնասիրություններ են կատարվում  Հանրային ծառայությունները կարգավորող հանձնաժողովի կողմից: Մեկ շաբաթից կամ տասը օրից հանձնաժողովը սակագնի վերաբերյալ հստակ հայտարարություն կանի: Ծախսերը կատարվել են ընկերության շահույթի հաշվին, չեմ կարծում, որ այդ ուսումնասիրությունների արդյունքները հանձնաժողովն անհետևանք կթողնի ու կներառի սակագնի մեջ: Կարծում եմ՝ չեն ներառի: Չեմ կարծում, որ 17 դրամով կթանկանա:  Անձամբ ինձ էլ ցանկալի չէ հոսանքի թանկացումը»,- ասաց նախարարը: