Պետբյուջեից կհատուցեն առաջնագծում զինծառայողների ստացած վնասվածքի կամ հիվանդության բուժումը արտասահմանում

Այսօր կառավարության նիստում պաշտպանության նախարար Սեյրան Օհանյանը ներկայացրեց ԱԺ պատգամավոր Էդմոն Մարուքյանի կողմից պատգամավորական նախաձեռնության կարգով ներկայացված` «Զինծառայողների և նրանց ընտանիքի անդամների բժշկական ապահովագրության մասին» օրենքում փոփոխություններ կատարելու մասին օրենքի նախագծի վերաբերյալ կառավարության եզրակացությունը:

Ըստ նախագծի` առաջարկվում է մարտական հերթապահություն իրականացնելիս կամ առաջնագծում հերթապահություն իրականացնելիս զինծառայողի ստացած վնասվածքի, խեղման կամ ծագած հիվանդության ժամանակ Հայաստանում զինծառայողի բուժման անհնարինության դեպքում բուժումն իրականացնել օտարերկյա պետություններում պետբյուջեի հաշվին` հատուցելով բուժման, կեցության և  ընտանիքի ուղեկցող անդամների ծախսերը:

Սեյրան Օհանյանը նշեց, որ այդ հարցն արդեն երկար ժամանակ է, ինչ օրակարգում է, անցել է քննարկման փուլ:

«Գտնում ենք, որ որոշումը լրացուցիչ խթան կհանդիսանա առանձնահատուկ պայմաններում զինծառայության պատշաճ մակարդակի իրականացման համար, կբարձրացնի զինծառայողների պաշտպանվածության մակարդակը: Խնդրում եմ հավանության տալ եզրակացությանը»,- ասաց նախարարը: