ՀՅԴ-ն կողմ է տեղական ինքնակառավարման համակարգում շրջանային կառավարման համակարգին

Այսօր ԱԺ հայտարարությունների ժամին ԱԺ ՀՅԴ խմբակցության պատգամավոր Արծվիկ Մինասյանը խոսեց տեղական ինքնակառավարման համակարգի մասին, մասնավորապես` համայնքների խոշորացման: Պատգամավորը նշեց, որ ՀՅԴ-ն կողմ է երկրում տեղական ուժեղ ինքնակառավարման համակարգի ձևավորմանը, որը պետք է արտահայտվի շրջանային կառավարման եղանակով, ինչը նշանակում է ամբողջությամբ վերանայել սահմանադրական կարգավորումները տեղական ինքնակառավարման համակարգի ուղղությամբ:

«Շրջանային կառավարումը կտա և կարող է ապահովել համայնքների ամբողջական ու լիարժեք զարգացում, ավելին` շրջանային կառավարումը հնարավորություն կտա մարզերում ապահովելու բազմակողմանի զարգացում: Այն գաղափարը, որ առաջ է քաշում կառավարությունը՝ խոշորացում անվան տակ, մեր կողմից ոչ միայն մերժելի է, այլ նաև փնջային տարբերակն է մերժելի»,- ասաց Արծվիկ Մինասյանը՝ մատնանշելով հանրաքվեի արդյունքները, երբ, բացառությամբ Սյունիքի, մնացած համայնքներում դեմ են քվեարկել:

Ըստ պատգամավորի` կառավարության փորձերը` առաջ տանել այս գաղափարը, կհանդիպի դիմադրության բնակչության կողմից: Արծվիկ Մինասյանը համոզված է, որ պետք է կյանքի կոչել շրջանային մոդելը, ինչը կստիպի վերանայել նաև մարզպետական համակարգը: Պատգամավորը կոչ արեց բոլորին`  միավորվել սահմանադրական փոփոխությունների շրջանակում տեղական ինքնակառավարման համակարգի վերանայմանը` ձևավորելով շրջանային կառավարման համակարգ: