ԱԱԾ-ն միջնորդել է երկարաձգել Երրորդմասցի Լյովիկի և ընկերների սպանության գործով մեղադրյալների կալանքի ժամկետները

Մայիսի 26-ին լրանալու է մարտի 4-ին «Նուբարաշեն» ՔԿՀ-ի մոտ Երրորդմասցի Լյովիկի և նրա ընկերների սպանության գործով մեղադրյալներ`  Վահան Հակոբյանի (Գաստիկի), Սարգիս Գրիգորյանի (Ծգլ) և Սարգիս Հախանումյանի (Տլե) երկամսյա կալանքի ժամկետը:

Yerkir.am-ի տեղեկություններով՝ նախաքննություն իրականացնող մարմինը՝ ՀՀ Ազգային անվտանգության ծառայությունը, դիմել է Կենտրոն և Նորք-Մարաշ վարչական շրջանների ընդհանուր իրավասության դատարան՝ հիշյալ մեղադրյալների կալանքի ժամկետները ևս երկու ամսով երկարաձգելու միջնորդությամբ:

Հիշեցնենք, որ երեք մեղադրյալները կալանավորվել էին մարտի 26-ին: Նրանց պաշտպաններ Լուսինե Սահակյանն ու Երվանդ Վարոսյանը բողոքարկել էին առաջին ատյանի որոշումները, սակայն վերաքննիչ դատարանը մերժել էր դրանք:

Մարտի 4-ին երեք դիմակավորված անձինք տարբեր տեսակի զենքերից կրակ էին բացել կալանավայրի ավտոկայանատեղիի ուղղությամբ, ինչի արդյունքում սպանվել էին քրեական հեղինակություն Երրորդմասցի Լյովիկը` Լևոն Ղազարյանը, Դերոն` Դրաստամատ Թադևոսյանը և Մեսրոպ Նազարյանցը: Հանցագործները դեպքի վայրում էին թողել զենքերը և փախուստի դիմել` շարժվելով Նուբարաշենի շենքերի ուղղությամբ: Դեպքի առթիվ հարուցվել է քրեական գործ` ՀՀ ՔՕ 104 հոդվածի 2-րդ մասի 1-ին կետի եւ 235 հոդվածի 1-ին մասի հատկանիշներով: