Լիսկայի որդու մասնակցությամբ ծեծկռտուքում տուժած եղբայրներից երկրորդին էլ են վիրահատել

Երեկ վիրահատել են մայիսի 2-ին Գորիսում Սյունիքի մարզպետ Սուրիկ Խաչատրյանի որդու մասնակցությամբ տեղի ունեցած միջադեպից տուժած Մուշեղ Զաքարյանի քիթը: Ծեծված Հարությունին էլ, որի աչքերն էին վիրահատվել, առաջիկա օրերին հնարավոր է տեղափոխեն Մոսկվա՝ բուժումն այնտեղ շարունակելու համար: Այս մասին yerkir.am-ին հայտնեցին տուժածների հարազատները:

Հիշեցնենք, որ ծեծի արդյունքում խաթարվել էր Հարություն Զաքարյանի աջ աչքի տեսողությունը: Մալայանի անվան ակնաբուժական կլինիկայի տնօրեն Ալեքսանդր Մալայանը yerkir.am-ի հետ զրույցում հայտնել էր, որ Հարությունի վնասվածքը դասվում է շատ ծանրների շարքը, որի ժամանակ խախտվում է տեսողության ֆունկցիան, շատ դեպքերում` անվերադարձ:

Ավելի վաղ հայտնել էինք, որ միջադեպից հետո ծեծված Մուշեղին տարել էին Գորիսի Սդղի գյոլ տարածքում գտնվող` Սուրիկ Խաչատրյանին պատկանող պանսիոնատը, որտեղ Սուրիկ Խաչատրյանը «զրուցել էր» Մուշեղի հետ, իսկ այդ ընթացքում Հարությունի հորեղբորորդին դժվարությամբ նրան տեղափոխել էր Գորիսի հիվանդանոց:

Նշենք, որ այսօր իրավապահները ժամանել են Սուրիկ Խաչատրյանի տուն՝ նրա որդուն բերման ենթարկելու, սակայն, մեր տեղեկություններով, նրան հայտնաբերել չի հաջողվել: