Սպորտի նախարարությունը փորձում է պարզել կատարվածի մանրամասները

Արդեն հայտնել ենք, որ Թբիլիսիում տեղի ունեցած կարատեի մրցաշարում ծեծկռտուք է տեղի ունեցել հայ և ադրբեջանցի մարզիկների միջև: Մանրամասները դեռևս հայտնի չեն: ՀՀ սպորտի և Երիտասարդության հարցերի նախարարության մամուլի ծառայությունը հաղորդագրություն է տարածել, որում ասվում է. 

«Համացանցում տարածված  տեղեկատվության՝ Թբիլիսիում հայ մարզիկների վրա գազազած ադրբեջանցիների ամբոխի հարձակման վերաբերյալ հայտնում եմ, որ ՀՀ սպորտի և երիտասարդության հարցերի նախարարությունը՝ նախարար Գաբրիել Ղազարյանի հանձնարարությամբ,  փորձում է կապ հաստատել կարատեի հավաքականի հետ ու պարզել կատարվածի մանրամասները, ինչպես նաև կազմակերպիչների և միջազգային ֆեդերացիայի հետ հարցը քննարկելուց, փաստերը պարզելուց հետո  կլինեն համապատասխան գնահատականներ, կներկայացվի հայկական կողմի պաշտոնական դիրքորոշումը:

Անհրաժեշտության դեպքում կկիրառվեն համապատասխան պատժամիջոցներ՝ ընդուպ մինչև որակազրկում և արգելք մասնակցելու միջազգային մրցաշարերին, ինչպես դա եղավ սամբոյի աշխարհի գավաթի խաղարկությունում հնչած Հայաստանի պետական օրհներգի ընթացքում կքանստած ադրբեջանցի մարզիկի նկատմամբ:

Մեկ անգամ ևս կրկնում  եմ, որ հայկական կողմի գնահատականն ու վերջնական հայտարարությունը կլինի միմիայն մեր պատվիրակության և վերոհիշյալ կազմակերպությունների հետ քննարկումն ավարտելուց հետո»:

Նախարարի մամուլի քարտուղար

Աստղիկ Մարտիրոսյան