Մենք համոզված ենք, որ Գոհար Ենոքյանը չի լքի հանրապետությունը. Էնֆիաջյան

ԲՀԿ խմբակցության քարտուղար Վահե Էնֆիաջյանը Yerkir.am-ի հետ զրույցում նշեց, որ ԱԺ նախկին պատգամավոր, ԲՀԿ-ական Գոհար Ենոքյանի խափանման միջոցը փոխելու նպատակով կազմակերպված ստորագրահավաքը միտված է վատառողջ կնոջն օգնելուն: «Իրավական գնահատականներ, բնականաբար, չեմ կարող տալ, բայց այդ ստորագրահավաքի բուն նպատակն այն է, որ խափանման միջոցը փոխվի, և Գոհար Ենոքյանը լինի ազատության մեջ` հանրապետությունից չբացակայելու պայմանով և դրանից բխող իրավիճակներով»,- ընդգծեց պատգամավորը:

Ըստ նրա` իրենք համոզված ենք, որ Գոհար Ենոքյանը չի լքի հանրապետությունը: Իսկ այն խնդիրները, որոնք առաջացել են, իրավական հարթությունում են և այդ հարթությունում էլ կլուծվեն: Վահե Էնֆիաջյանը նշեց նաև, որ չի կարող իրեն թույլ տալ ասել` իրականում եղե՞լ է նման հանցանք Գոհար Ենոքյանի կողմից, թե՞ ոչ: