«Շարժում 88»-ն ընտրատեղամասերում վստահված անձինք չի ունեցել

ԱԺ ընտրությունների ողջ գործընթացը գրեթե առանց խախտումների են անցել. Yerkir.am-ի թղթակցին ասել է «Շարժում 88» կուսակցության նախագահ Վիտալի Բալասանյանը:

Ուշագրավ է, որ Բալասանյանը նշել է, թե ինքն ընտրատեղամասերում չունի վստահված անձինք: Հարցին, թե ի՞նչն է պատճառը, նա պատասխանել է. «Նախ` արդեն տասը տարի է` պատգամավոր եմ, հետո նշեմ, որ ես Ասկերանի շրջանի բնակիչ եմ, նախագահական ընտրություններին եմ մասնակցել, և իմ շրջանի բոլոր մարդիկ իմ վստահված անձինք են, ես բոլորին էլ վստահում եմ»:

Հարցին, թե արդյո՞ք «Շարժում-88»-ը ընդդիմադիր ուժ է եւ ի՞նչ ակնկալիքներ ունի ընտրություններից, Վիտալի Բալասանյանը պատասխանել է. «Ես չեմ հիշում, որ հայտարարած լինեմ, թե ընդդիմադիր ուժ ենք, ես անկուսակցական եմ, չնայած ղեկավարում եմ կուսակցության ցուցակը: Նշեմ, որ «Շարժում 88» էլ իրեն ընդդիմություն չի հայտարարել: Թող ժողովորդն իր ասելիքը ասի ու որոշի»:

 Բալասանյանը, անդրադառնալով ընտրություններից հետո խորհրդարանական ուժերի դասավորության իր կանխատեսումներին, նշել է, որ միայն ժամանակը կարող է այդ հարցում կոնկրետություն մտցնել: