Ոչ մի տարածք չունենք` տալու. թուրք քաղաքապետը՝ Սիսի կաթողիկոսարանի վերադարձի մասին

Մեծի Տանն Կիլիկիո կաթողիկոսության` Սիսի կաթողիկոսարանի վերադարձը պահանջող դատական հայցի մասին հայտարարությամբ է հանդես եկել Ադանայի Քոզան շրջանի քաղաքապետ Մուսա Օզթուրքը.տեղեկացնում է Haberler-ը:

Նշելով, որ Կիլիկիայի վանքը պատկանում է Քոզանի քաղաքապետարանին, Օզթուրքն ասել է. «Ոչ ոքի տալու տարածք չունենք»:

Նրա խոսքով՝ Լոզանի պայմանագրում ոչ մուսուլմանների համար պայման էր դրված: «Նրանք 6 ամսվա ընթացքում պետք է գային և իրենց ունեցվածքին տեր կանգնեին: Այդ օրից ի վեր նրանց` տեր չկանգնած ամեն ինչը մնացել է գանձարանին, այնտեղից էլ մեզ է անցել: Ընկերները թող իրենց անցյալին լավ նայեն: Այդպես գալով, վանք, մանք պահանջելով… Կներեք, բայց նրանց տալու ոչ մի տարածք չունենք: Մենք էլ ենք այստեղ ապրում»,- ասել է Օզթուրքը: