ԱՄՆ-ը պահանջում է Ադրբեջանից` բանտից ազատել 12 լրագրողների և բլոգերների

ԱՄՆ-ը կարծում է, որ Ադրբեջանի իշխանությունները չեն կատարում իրենց պարտականությունները քաղաքացիական իրավունքի և ազատության ոլորտում, մասնավորապես՝ կարծիք հայտնելու ազատության հարցում և անարդարացիորեն կալանավորել են 12 լրագրողների և բլոգերների: Այդ մասին հայտարարել է ԱՄՆ պետդեպի պաշտոնական ներկայացուցիչ Մարի Հարֆը. հայտնում է ТАСС-ը:

Նա խոսել է նաև «Թալիշի ձայնը» թերթի նախկին գլխավոր խմբագիր  Գիլալ Մամեդովի ձերբակալության մասին:

«Մենք կոչ ենք անում անհապաղ ազատել Մամեդովին, ինչպես նաև մյուս լրագրողներին և բլոգերներին, ովքեր բանտում են հայտնվել միայն այն բանի համար, որ օգտվել են իրենց կարծիքն ազատ արտահայտելու իրավունքից»,- ասել է Հարֆը:

«Մենք կոչ ենք անում Ադրբեջանին` դադարեցնել նմանատիպ հետապնդումները և այլ տեսակի ճնշումները անկախ ԶԼՄ-ների նկատմամբ և կատարել իրենց պարտականությունները կարծիք հայտնելու ազատության ոլորտում»,- հավելել է նա: