Բարսելոնայի Փաստաբանների միությունը կոչ է անում ճանաչել Հայոց ցեղասպանությունը

Բարսելոնայի Փաստաբանների միության Միջազգային քրեական արդարադատության հանձնաժողովը  (Icab)  «Հայոց ցեղասպանության միջազգային ճանաչման» կոչ է արել կոտորածների 100-րդ տարելիցի առթիվ կազմակերպված համաժողովում: Կլոր սեղանը մեկնարկել է ապրիլի 28-ին`   «Հայոց ցեղասպանության 100-րդ տարելիցը. միջազգային ճանաչում» հարցի քննարկումով:

Ապրիլի 29-ին  հրապարակված  հաղորդագրության համաձայն` հանձնաժողովի նախագահ Խուան Մերելո-Բարբերան  համաժողովում կարևորել է պատմական հիշողության նշանակությունը և ընդգծել  անհրաժեշտությունը, որ «ԵՄ երկրները միջազգային մակարդակով  ճանաչեն 1915 թվականին հայերի դեմ իրականացված հարձակումների իրականությունը»: 

Բարսելոնայի Փաստաբանների միության Միջազգային քրեական արդարադատության հանձնաժողովը  գտնում է, որ Հայաստանը «արժանի է այս միջազգային ճանաչմանը, քանի որ այդ կոտորածները դատապարտող միջազգային վճռի բացակայությամբ անհրաժեշտ է, որ ԵՄ անդամ երկրները ճանաչեն եղելությունը: Այս քայլը կարող է ծառայել որպես իրավական փաստաթուղթ հայերի համար, ովքեր առնվազն կունենան միջազգային հանրության բարոյական ճանաչումը»: