Մինսկի խմբի ձեւաչափի խախտումը կարող է հանգեցնել բանակցային գործընթացի արդյունքների ջրման. ՌԴ փոխարտգործնախարար

«Մինսկի խմբի շրջանակներում ահռելի միջնորդական փորձ է կուտակվել: Հաշվի առնելով ղարաբաղյան թեմայի նրբությունը, առկա ձեւաչափը փոխելու յուրաքանչյուր փորձ կարող է հանգեցնել բանակցային գործընթացի ջրման, ինչպես նաեւ կարող է կողմերի դիրքորոշումները վերադարձնել նախկին դիրքեր»:

Անդրադառնալով Ղարաբաղյան հակամարտության բանակցային ձեւաչափի փոփոխությանը, մասնավորապես՝ բանակցություններին Գերմանիային եւ Թուրքիային ներգրավելու խնդրին,  ադրբեջանական ԱՊԱ-ին տված հարցազրույցում հայտարարել է Ռուսաստանի ԱԳ փոխնախարար Գրիգորի Կարասինը:

Կարասինը նաեւ  ընդգծել  է, որ բանակցային ողջ գործընթացում կարեւոր նշաձողեր են  1994-ին կրակի դադարեցումը եւ հրադադարի ռեժիմի ամրապնդումը 1995-ին, որն ընդունվել է Ռուսաստանի անմիջական միջնորդությամբ: