Պայթեցվել է Հալեպի Սրբոց Քառասնից Մանկանց Մայր եկեղեցին

Հալեպում զինյալները ապրիլի 28-ին պայթեցրել են Մեծի Տանն Կիլիկիո կաթողիկոսության Բերիո թեմի առաջնորդանիստ` Սրբոց Քառասնից Մանկանց մայր եկեղեցին. տեղեկացնում է Civilnet-ը՝ վկայակոչելով Al-Monitor-ը:

Ըստ Սիրիայի թղթակից Էդվարդ Դարկի՝ 15-րդ դարում կառուցված եկեղեցին պայթեցվել է պատերում փորված և այնտեղ տեղադրված ռումբերի միջոցով: Եկեղեցին ամբողջովին հողին է հավասարեցվել, չի փլուզվել միայն զանգակատան մի փոքր հատված:

Եկեղեցին գտնվում է Հալեպի պատմական Ջդեյդե թաղամասում: Եկեղեցու շուրջ գտնվում է հայկական գերեզմանատունը: Եկեղեցին մի քանի անգամ վերանորոգվել է: Սրբոց Քառասնից Մանկանց եկեղեցու համալիրում կան բազմաթիվ սրբապատկերներ՝ հիմնականում 17-րդ դարի, նրա կազմում ներառված են նաև հայկական դպրոց, ինչպես նաև Սուրբ Աստվածածին եկեղեցին: