Իսրայելի հայ համայնքը նախատել է երկրի նախագահին Ցեղասպանությունը չճանաչելու համար

Իսրայելի նախագահ Ռեուվեն Ռիվլինը կիրակի Երուսաղեմի իր նստավայրում ընդունել է հայ համայնքի ներկայացուցիչներին և նրանցից նախատինքներ լսել այն մասին, որ հրեական պետությունը չի ցանկանում ճանաչել Հայոց ցեղասպանությունը. հայտնում է РИА Новости-ն։

Ռիվլինը, դատելով  նրա մամուլի ծառայության հաղորդագրությունից, օգտագործել է հայերի «զանգվածային սպանություն» կամ «հայերի ողբերգություն» արտահայտությունները և ասել, որ Իսրայելի իշխանությունները չեն ձգտում մեղքը որևէ կոնկրետ երկրի վրա բարդել։

«Հայ ժողովուրդը եղել է ժամանակակից զանգվածային սպանության առաջին զոհը։ Մենք չենք ձգտում մեղավոր համարել որևէ երկրի, սակայն մեր համերաշխությունն ենք հայտնում կոտորածների զոհերին»,- նշվում է նախագահի մամուլի ծառայության հաղորդագրությունում։

Հանդիպման մասնակիցներից մեկը՝ Երուսաղեմի Հայոց պատրիարքարանի ներկայացուցիչ, արքեպիսկոպոս Արիս Շիրվանյանը հիասթափություն է հայտնել, որ Իսրայելը հայերի սպանությունը «ցեղասպանություն» չի անվանում:

Հաղորդագրությունում նշվում է նաև, որ նախագահը նշել է, որ քննադատությունը հաշվի կառնի, և կարծում է, որ երկրի ղեկավարությունը պետք է ավելին անի հայերի սպանության հարցը բարձրացնելու համար։