Էրդողանը, զարմանալիորեն, դատապարտել է ընդդիմադիր կուսակցության գրասենյակի վրա զինված հարձակումը

Թուրքիայի նախագահ Ռեջեփ Թայիփ Էրդողանը զարմանալի քայլ է արել՝ դատապարտելով ընդդիմադիր քրդամետ Ժողովրդա-դեմոկրատական կուսակցության գլխավոր գրասենյակի վրա հարձակումը:

Ըստ Radikal-ի՝ Էրդողանը տարածած հայտարարության մեջ ասել է. «Ապրիլի 18-ին Ժողովրդա-դեմոկրատական կուսակցության շենքի վրա կատարված զինված հարձակումը խստորեն դատապարտում եմ: Մեր երկրի խաղաղության և կայության միջավայրում քաղաքականությանն ուղղված ոչ մի հարձակում երբևէ չի հասել իր նպատակին»: Նա նշել է, թե թուրք ժողովրդի միակ մխիթարությունն այն է, որ հարձակման ընթացքում զոհեր կամ վիրավորներ չեն եղել:

Ի դեպ, հիշեցնենք, որ այսօր Էրդողանի կուսակիցն իր վրդովմունքն էր հայտնել սույն կուսակցության ղեկավար Սելահաթթին Դեմիրթաշի վերաբերյալ, ով հավանություն էր տվել Հռոմի Ֆրանցիսկոս պապի հայտարարությանը Հայոց ցեղասպանության մասին: Նա Դեմիրթաշին խորհուրդ էր տվել Հայաստանում անցկացնել նախընտրական քարոզարշավը: