ԱՄՆ պետդեպը դարձյալ խուսափել է «ցեղասպանություն» բառից

ԱՄՆ պետդեպարտամենտը երեկ դատապարտել է Օսմանյան կայսրությունում հայերի զանգվածային ոչնչացումը, սակայն դարձյալ հրաժարվել է դա ցեղասպանություն կոչել. հայտնում է РИА Новости-ն:

Լրագրողները պետդեպի ներկայացուցիչ Մարի Հարֆին խնդրել են  մեկնաբանել Հռոմի պապի հայտարարությունը, որ հայերի զանգվածային ոչնչացումը 20-րդ դարի առաջին ցեղասպանությունն է եղել:

Հարֆն, ի պատասխան, ասել է հետևյալը. «ԱՄՆ նախագահն ու նրա վարչակազմի բարձրաստիճան պաշտոնյաները բազմիցս ընդունել են, որպես պատմական փաստ, Օսմանյան կայսրության գոյության վերջին օրերին 1,5 մլն հայերի ոչնչացումը և ընդգծել, որ այդ փաստի ամբողջական հաստատումը բխում է բոլորի շահերից, այդ թվում՝ Թուրքիայի, Հայաստանի և ԱՄՆ-ի»:

Հարֆը դարձյալ խուսափել է «ցեղասպանություն» բառից: