Ծառուկյանի բիզնեսներում հարկային ստուգումների մասին տեղեկությունը գաղտնի է պահվում

Փետրվարի 12-ին տեղի ունեցած` ՀՀԿ ԳՄ հայտնի նիստի ընթացքում Սերժ Սարգսյանը բոլոր պատկան մարմիններին հրահանգել էր Գագիկ Ծառուկյանին պատկանող ձեռնարկություններում ստուգումներ իրականացնել: Սարգսյանն ասել էր, թե տարիներ ի վեր շարունակում են օդում կախված մնալ չստուգված լուրերը չմուծված միլիարդավոր դրամ հարկերի մասին, և հորդորել էր մինչև վերջ ու մանրամասն ստուգել լուրերի իսկությունը և ներկայացնել բոլորին:

Yerkir.am-ի հետ զրույցում Գագիկ Ծառուկյանի մամուլի խոսնակ Իվետա Տոնոյանը նշեց, որ Ծառուկյանին պատկանող «Մուլտի Գրուպ»-ի կազմում գտնվող մի շարք ընկերություններում իսկապես եղել են հարկային ստուգումներ, սակայն ինքն արդյունքների մասին դեռ տեղեկություններ չունի: «Վերջին օրերից տեղեկություններ չունեմ և չեմ կարող ասել՝ ինչ փուլում են ստուգումները. Հայաստանում չեմ: Այս պահի դրությամբ հստակ տեղեկություն չունեմ»,- ասաց Տոնոյանը:

Հիշեցնենք, որ ֆինանսների նախարարությունը հրաժարվում է հստակ տեղեկություն տալ այդ ստուգումների մասին: