Դու հայ ես ու միայնակ. Թուրքիայում սպառնացել են հայ կնոջն ու տունը խլել ձեռքից

Թուրքիայում Բաքըլրքոյ շրջանի հայ բնակիչ Զ.Ք.-ն դիմել է դատարան՝ վերադարձնելու իր տունը, որն իր ձեռքից խլել են իր աշխատավայրի ղեկավարն ու հաշվապահը:

Ըստ «Ակօս»-ի՝ Զ.Ք-ն ամուսնալուծված է և 2010-ից ապրում է իր միակ երեխայի հետ: Նույն թվականին նա աշխատանքի է ընդունվել Ազիզ Քադալ անունով մեկի ընկերությունում: Քադալին պարտքով գումար տված Զ.Ք-ն, չկարողանալով հետ վերցնել տված գումարի կեսը, հեռացել է և ընդունվել այլ աշխատանքի: Երկու տարի շարունակ սպառնալիքների ենթարկված Զ.Ք.-ն դիմել է ոստիկանության, սակայն` ապարդյուն:

Աշխատավայրի ղեկավարն ու հաշվապահը, կնոջը սպառնալով, թե` «դու հայ ես ու միայնակ, գիտենք, թե որտեղ է սովորում քո երեխան», ստիպել են ստորագրել լիազորագիր: Թեեւ նոտարի միջամտությամբ հաջողվել է այն չեղյալ համարել, հայտնի է դարձել, որ կնոջն տունն արդեն հասցրել են վաճառել:

Հայ կինը դիմել է Բաքըրքոյի 14-րդ ծանր հանցագործությունների դատարան՝ հանցագործներին «խաբեության և սպառնալու» մեղադրանքով դատի տալով: