Հռոմի պապը Գրիգոր Նարեկացուն շնորհել է «Եկեղեցու ուսուցիչ» տիտղոսը

Հռոմի պապ Ֆրանցիսկոսը 10-րդ դարի միստիկ բանաստեղծ Գրիգոր Նարեկացուն շնորհել է «Եկեղեցու ուսուցիչ» տիտղոսը. տեղեկացնում է Associated Press-ը:

Երկուշաբթի Վատիկանը հայտարարել է, որ Ֆրանցիսկոսը համաձայնել է Վատիկանի սրբերի միաբանության ժողովի ժամանակ ընդունված որոշմանը, ըստ որի` Գրիգոր Նարեկացուն շնորհվել է եկեղեցական մեծագույն պարգևներից մեկը:

«Եկեղեցու ուսուցիչ» տիտղոսը շնորհվում է աստվածաբաններին Հռոմի պապի կողմից միջնադարից ի վեր՝ եկեղեցուն առանձնահատուկ ծառայություններ մատուցելու կամ սրբության համար:

Հիշեցնենք, որ Հռոմի պապն ապրիլի 12-ին  Սբ Պետրոս Մայր տաճարում կանցկացնի պատարագ՝ ի հիշատակ Հայոց ցեղասպանության զոհերի: