Մոսկվան պատրաստ չէ հանձնել Պերմյակովին. պատգամավոր

Այսօր Ավետիսյանների ընտանիքի քառասունքն է: Լրագրողների հետ զրույցում ԱԺ պատգամավոր Մարտուն Գրիգորյանը հայտնեց, որ Մոսկվայում բարձրացրել է Պերմյակովին Հայաստանին հանձնելու հարցը, քանի որ «դա մեր` հայ ժողովրդի ցանկությունն է, որ նա հանձնվի հայ իրավապահներին, և դատավարությունն ընթանա այստեղ»:

«Ինձ պատասխանեցին, որ պատրաստ չեն նրան հանձնել, բայց պատրաստ են քննչական գործողությունները համատեղ անել, այսինքն` որպեսզի դատավարությունը Հայաստանում իրականանա: Իսկ թե պատիժը կոնկրետ որտե՞ղ է կրելու, այդ առումով հստակ պատասխան չտվեցին»,- ասաց պատգամավորը:

Դիտարկմանը, որ Ավետիսյանների հարազատները պնդում են, որ Պերմյակովին հանձնեն հայկական կողմին, այլապես նրանք կդիմեն ծայրահեղ քայլերի, Գրիգորյանն արձագանքեց, թե չգիտի` ծայրահեղ քայլերի դիմելն ինչ է նշանակում, բայց կարծում է, որ նրանց պահանջն արդարացի է: «Ես գյումրեցիների կողքին եմ»,- ասաց նա: