Գիրք նվիրելու օրը դարձյալ «Անդին»-ի հետ

Գիրք նվիրելու օրվա կապակցությամբ փետրվարի 19-ին «ԱրտԲրիջ» գրախանութ-սրճարանում «Անդին»-ը, ավանդույթի համաձայն, հավաքել էր իր հեղինակներին, բազմաթիվ գրողների և այլ անդինասերների:

Միջոցառման ժամանակ ներկայացվեց «Անդին»-ի 12-րդ ԲԱՑԱՌԻԿ համարը, իսկ 2014 թվականի նախորդ համարները հյուրերն ստացան որպես նվեր:

Ամսագրի գրական բաժնի խմբագիր, բանաստեղծուհի Անի Տեր-Գուլանյանը ողջույնի իր խոսքում ասաց, որ երկու գրողի, ինչպես նաև գրողի հետ ընթերցողի հանդիպումն ինքնին արդեն մշակույթ է, և գիրք նվիրելու օրվա հետ կապված` «Անդին»-ի այս միջոցառումը, իր շուրջը հավաքելով ամսագրի հեղինակներին և ընթերցողներին, ստեղծում է մշակութային մի միջավայր, որի նպատակն է անմիջական շփումը:

«Անդին»-ին միացավ նաև ՀՀ մշակույթի նախարարությունը, որը Հովհաննես Թումանյանի ծննդյան և Գիրք նվիրելու օրվա առթիվ անակնկալ էր պատրաստել երիտասարդ գրողների համար՝ նվիրելով Դերենիկ Դեմիրճյանի և Պարույր Սևակի ընտրանիները: