Կոմիտասի ողջ ժառանգությունը` խտացված մեկ ալբոմում

Հայաստանի Հանրային ռադիոյի ձայնադարանը համալրվել է թվայնացված ևս մեկ ալբոմով. Կոմիտաս վարդապետի 145-ամյա հոբելյանին նվիրված ձայնասկավառակը ներառում է հայերեն և անգլերեն 7 աուդիո և 1 մուլտիմեդիա սկավառակներ:

Այստեղ ընդգրկված են Կոմիտասի լուսանկարներն ու մատիտանկարները, նրա կատարմամբ` պահպանված ձայնագրությունները, ինչպես նաև Հայաստանի երաժշտական կոլեկտիվների` կոմիտասյան ստեղծագործությունների լավագույն կատարումները: Ինքնատիպ այս հավաքածուն ոչ միայն սերունդներին փոխանցվող մշակութային արժեք է, այլ նաև Հայոց ցեղասպանության 100-րդ տարելիցին ընդառաջ ներկայացվող կոչնակ` ուղղված ամբողջ աշխարհին:

Հավաքածուն նախատեսված չէ վաճառքի համար, թվայնացված այս ալբոմը կտրամադրվի աշխարհի խոշոր համալսարանների գրադարաններին: Սա ապագա սերունդներին ուղղված պատգամ է՝ պահպանել ու տարածել մեզ հասած մշակութային հարուստ ժառանգությունը: