Վախենալով հայկական լոբբիներից` թուրքերը գաղտնի են պահում Չանաքքալեի միջոցառումների մասնակիցների անունները

«Ապրիլի 24-ին` այսպես կոչված, Հայոց ցեղասպանության 100-րդ տարելիցին, Չանաքքալեի ճակատամարտի 100-ամյակի համար կազմակերպված միջոցառումները ոտքի են հանել հայկական լոբբիին»,- գրում է Tukiyegazetesi-ն:

Ըստ կայքի` լոբբին մտադիր է հարված հասցնել Չանաքքալեի միջոցառումներին:

«Թուրքիան Չանաքքալեի ճակատամարտի 100-ամյակը տոնելու համար նախագահի մակարդակով աշխատանքներ էր սկսել: Այդ շրջանակներում նախագահ Ռեջեփ Թայիփ Էրդողանը 102 երկրների նախագահների ու կառավարության ղեկավարների հրավիրել էր Չանաքքալե: Նույն հրավերն արվել էր նաև Հայաստանին»,- գրել է կայքն ու մեջբերել ՀՀ նախագահ Սերժ Սարգսյանի պատասխանը, նշելով` «նախագահականի խոսնակ Իբրահիմ Քալընը Սարգսյանի խոսքերը ամբողջովին վերադարձնում է իրեն»:

Ըստ կայքի` այժմ հայկական լոբբիստական կազմակերպությունները, վախենալով, որ Թուրքիայում կայանալիք միջոցառմանը բարձր մակարդակով մասնակցություններն ավելի շատ կլինեն, փորձում են տապալել այն: Այդ իսկ պատճառով Անկարան, զգուշանալով, որ հայերը կարող են ճնշել Թուրքիա գալ ցանկացողներին, գաղտնի է պահում միջոցառման մասնակիցների ցուցակը: Ենթադրվում է, որ միջոցառումների մասնակիցների անունները մինչև վերջին պահը չեն հրապարակվի: