Թուրք քաղաքացին դատի կտա Հայաստանին. պահանջում է գոյություն չունեցող գյուղ

Օրեր առաջ 94-ամյա ամերիկահայ Զվարթ Սուջյանը դատի էր տվել Թուրքիային` Տիգրանակերտում գտնվող իր պապենական տարածքը վերադարձնելու պահանջով: Այդ տարածքում այժմ գտնվում է Տիգրանակերտի օդանավակայանը: Այդ դեպքից հետո թուրքերն էլ որոշել են «պատասխան» քայլ կատարել:

Թուրքական Ensonhaber կայքը հաղորդում է, որ Թուրքիայի քաղաքացի, Էրզրումի բնակիչ Ջոշքուն Ըշըքը դատի է տվել Հայաստանին` պահանջելով Ալմավիր գյուղը (գյուղի անվանումը` ըստ թուրքական կայքի-խմբ.):

Ըշըքը պնդել է, որ Ալմավիր գյուղում ժամանակին ապրել են մուսուլմաններ, ինչի մասին ապացուցող փաստաթղթերի հիման վրա էլ ինքը պատրաստվում է դատի տալ Հայաստանին:

Ի զարմանս Ըշըքի` Հայաստանում Ալմավիր անունով գյուղ չկա: Հավանաբար, խոսքն Արմավիրի մասին է, բայց այն ո’չ գյուղ է, ո’չ էլ, առավել ևս, եղել է մուսուլմաններով բնակեցված:

Հիշեցնենք, որ Հայկական սփյուռքը պահանջում է նաև Թուրքիայի նախագահի նախկին նստավայրը, որը, ինչպես Թուրքիայում բազում կառույցներ, պատկանել են հայի: Իսկ եկեղեցապատկան նախկին հողերի վերադարձի պահանջ են ներկայացնում Ամենայն Հայոց եւ Մեծ Տանն Կիլիկիո կաթողիկոսները: