Զինվորը չի կարող ոճրագործ լինել, ասկյարն է ոճրագործ լինում

Գյումրիի Սբ Նշան եկեղեցում այժմ տեղի է ունենում 6 անմեղ զոհերի հոգեհանգստի արարողությունը:

Արարողությունն անցկացնող` Շիրակի թեմի առաջնորդ Տ. Միքայել եպիսկոպոս Աջապահյանը նշեց, որ նրանց փոխարեն մեզանից մեկը կարող էր լինել: Ըստ նրա` այժմ ծագում են հարցեր, որոնց պատասխանը մենք ակնկալում ենք ստանալ:

«Մենք ուրիշ բան չենք ուզում, այլ միայն ապահովություն և խաղաղություն, քանի որ մենք զինվորին միշտ նայել ենք իբրև խաղաղության երաշխիքի, ոչ թե` մեր տունը գիշերով մտնող ու մեր զավակներին մորթող: Ուրեմն ինչ-որ բան ինչ-որ տեղ սխալ է, և այդ սխալը սրբագրել ենք պահանջում: Զինվորը չի կարող ոճրագործ լինել, ասկյարն է ոճրագործ լինում: Հարցեր կան, որոնց հետ կապված` մեր ժողովուրդը սպառիչ պատասխան ստանալու իրավունք ունի»,- ասաց հոգևոր հայրը: