Նիկոլ Փաշինյանն առաջարկում է կրճատել տոնական ոչ աշխատանքային օրերի քանակը

Այսօր ԱԺ նիստում, դիմելով գյուղատնտեսության նախարար Սերգո Կարապետյանին, ԱԺ ընդդիմադիր պատգամավոր Նիկոլ Փաշինյանը նշեց, որ իր ասելիքն ավելի շատ առաջարկ է, քան ուղիղ կապ ունի քննարկվող համաձայնագրի հետ:

«Վերջին օրերին ֆինանսատնտեսական և ապրանքային շուկայում տեղի ունեցող վայրիվերումների ֆոնին առավել անհասկանալի է դառնում կառավարության որոշումը` 12 օր ոչ աշխատանքային հայտարարելու մասին: Վախենամ, որ 12 ոչ աշխատանքային օրեր անցկացնելուց հետո, երբ կառավարությունը, ԿԲ-ն, պետական մարմինները փակ կլինեն, հանկարծ հունվարի 13-ին պարզվի, որ իրավիճակը դուրս է եկել վերահսկողությունից: Առաջարկում եմ, և արժե, որ կառավարությունը վերանայի իր որոշումը, տրամաբանական կլինի, որ հունվարի 1, 2-ը և 6, 7-ը լինեն ոչ աշխատանքային օր, որպեսզի հանրությունը օպերատիվ տեղեկություններ ստանալու հնարավորություն ունենա»,- ասաց պատգամավորը` հավելելով, որ նաև առիթ կլինի, որ կառավարությունը վերացնի մեռելոցները:

Գյուղատնտեսության նախարարը նշեց, որ պատգամավորի առաջարկը կփոխանցի կառավարության անդամներին: