«Միջազգային հանրությունը պետք է ավելի շատ ճնշում գործադրի Ադրբեջանի վրա»

Արցախի Հանրապետությունը պետք է քայլեր ձեռնարկի`  ղարաբաղա-ադրբեջանական շփման գծում ադրբեջանական զինուժի կողմից խոցված հայկական ուղղաթիռի անձնակազմի ճակատագիրը պարզելու համար: Այս մասին ԱԺ-ում լրագրողների հետ զրույցում հայտարարեց ԱԺ փոխնախագահ Էդուարդ Շարմազանովը:

«Թե ինչպիսի՞ն կլինեն արցախյան կողմի քայլերը, բացառապես կախված է Ադրբեջանի ղեկավարության կեցվածքից եւ իրականությունը սթափ գնահատելու` Ադրբեջանի կարողությունից»,- ասաց նա:

ԱԺ փոխնախագահը նշեց նաեւ, որ ադրբեջանական կողմն անմարդկային կեցվածք է ցուցաբերում՝ իրականացնելով շարունակական սադրանքներ: Ըստ Շարմազանովի` իրավիճակի հնարավոր սրման ամբողջական պատասխանատվությունն ընկնելու է բռնապետական Ադրբեջանի վրա:

Նրա կարծիքով` միջազգային հանրությունը պետք է ավելի շատ ճնշում գործադրի Ադրբեջանի վրա, որովհետեւ այդ երկիրը կոպտորեն խախտում է Ժնեւյան կոնվենցիան: