Ուղղաթիռի ոչնչացումը բռնության վտանգավոր դրսևորում է. Բորդյուժա

ՀԱՊԿ գլխավոր քարտուղար Նիկոլայ Բորդյուժան հայտարարություն է տարածել ադրբեջանական զինուժի կողմից Լեռնային Ղարաբաղում ուղղաթիռի կործանման առնչությամբ. հայտնում է РИА Новости-ն: Նա նշել է, որ այդ  միջադեպը տարածաշրջանում իրադրության հետագա սրացման վտանգ է ստեղծում:

«Այս վտանգավոր միջադեպը հրահրում է տարածաշրջանում իրավիճակի հետագա սրումը և ուժեղացնում է մեր անհանգստությունը»,- ասված է հայտարարությունում:

Բորդյուժան նաև նշել է. «Այսօր բոլորս հրադադարի մասին պայմանավորվածությունների նոր խախտման ականատես եղանք»:

«Ուղղաթիռի ոչնչացումը բռնության վտանգավոր դրսևորում է: Առաջացել է հակամարտության սրման նոր սպառնալիք: Հարավային Կովկասում իրավիճակը դառնում է  ավելի սրված»,- ասվում  է հայտարարության մեջ:

«ՀԱՊԿ-ում խորապես համոզված են իրավիճակի սպառնալից զարգացումը թույլ չտալու անհրաժեշտության մեջ: Ամենակարևորը, ինչը կարող է կանխել իրադարձությունների նման շրջադարձը, ուժի կիրառումից հրաժարվելն է, հրադադարի մասին պայմանավորվածությունների խստագույն պահպանումը և սադրիչ գործողություններ թույլ չտալը: Կարևոր է ապահովել ԼՂ հակամարտության  կարգավորման բանակցային գործընթացի շարունակությունը»,- ասվում է Բորդյուժայի հայտարարությունում: