27 մլն դոլար` Երևանում չինարենի խորացված ուսուցմամբ դպրոց կկառուցվի

Կառավարությունը վաղը քննարկելու է Երևանում չինարենի խորացված ուսուցում անցկացնելու նպատակով նոր շինություն կառուցելուն հավանություն տալու հարցը:

Հայաստանի Հանրապետության կառավարության և Չինաստանի Ժողովրդական Հանրապետության կառավարության միջև 2012 թվականի դեկտեմբերի 28-ին և 2013 թվականի սեպտեմբերի 10-ին ստորագրվել է «Տեխնիկատնտեսական համագործակցության մասին» համաձայնագրերը, որում Չինաստանի ժողովրդական Հանրապետության կառավարությունը Հայաստանի Հանրապետության կառավարությանը տրամադրելու է 27 միլիոն դոլար անհատույց օգնություն:

Նշված համաձայնագրերի շրջանակներում պետք է իրականացվի Երևանում չինարենի խորացված ուսուցմամբ դպրոցի շինարարություն, որի ստեղծման վերաբերյալ պայմանավորվածությունը ձեռք է բերվել Հայաստանի Հանրապետության և Չինաստանի ժողովրդական Հանրապետության Նախագահների միջև 2010 թվականին կայացած հանդիպման ժամանակ:

Դպրոցի շինարարության ծրագրերի իրականացման ուսումնասիրության արդյունքում երկկողմանի համաձայնությամբ նախատեսվել է նշված դպրոցի շինարարությունն իրականացնել Երևան քաղաքի Զ.Սարկավագի 14 հասցեում գտնվող` Երևանի Հ.Գյուլիքեխվյանի անվան N103 ավագ դպրոցին օգտագործման իրավունքով հանձնված 1.5 հա հողամասում: