Հայաստանում պաշտոնյաների «դեդավշչինա» գոյություն ունի՝ ի դեմս Տարոն Մարգարյանի եւ Սուրիկ Խաչատրյանի

Այսօր ԱԺ տարածքային կառավարման եւ տեղական ինքնակառավարման հարցերի ու ֆինանսավարկային եւ բյուջետային հարցերի մշտական հանձնաժողովների համատեղ նիստին, ինչպես միշտ, ներկա չէր Երեւանի քաղաքապետ Տարոն Մարգարյանը: Նիստին չէր ներկայացել նաեւ Սյունիքի մարզպետ Սուրեն Խաչատրյանը:

ԱԺ պատգամավոր Նիկոլ Փաշինյանի հարցը հենց նրանց բացակայության մասին էր: «Ես չեմ հասկանում` Հայաստանում պաշտոնյաների «դեդավշչինա՞» գոյություն ունի»,- հարցրեց նա եւ նշեց, որ երեք տարի շարունակ նույն անձինք բացակայում են բյուջեի քննարկումներից:

Պատգամավորը շեշտեց` երեք տարի այս հարցը բարձրացրել է, ու իրեն միշտ ասել են, որ Տարոն Մարգարյանը, Սուրիկ Խաչատրյանը կարևոր գործեր ունեն: Նա հեգնանքով նշեց. «Հավաքվել ենք ոչ կարևոր գործերի համա՞ր: Ես հիմա շատ կարևոր գործեր ունեմ ու ցավով պետք է լքեմ այս քննարկումը, իսկ եթե Տարոն Մարգարյանն ու Սուրիկ Խաչատրյանը ներկայանան, հեռախոսահամարս ունեք, զանգեք, կգամ»:

Ասելով այս ամենը` Նիկոլ Փաշինյանը լքեց նիստերի սենյակը: