Տիգրանակերտում քրդերի ցույցը լուսաբանելու համար ձերբակալվել է գերմանացի 3 լրագրող

«Լրագրողներն առանց սահմանների» միջազգային իրավապաշտպան կազմակերպությունը և քուրդ ակտիվիստները հաստատել են Տիգրանակերտում (Դիարբեքիր) Սիրիա-Թուրքիա սահմանի (Քոբանիում ԻՇԻՊ-ի իրականացրած հարձակումների դեմ բողոքի ցույցեր) իրադարձությունները լուսաբանող գերմանացի 3 լրագրողների ձերբակալման մասին լուրը: Այդ մասին հայտնում է Odatv-ն:

Ըստ կայքի՝ լրագրողները ձերբակալվել են «սադրիչ» լինելու կասկածանքով:

Ձերբակալման ժամանակ լրագրողներից մեկն իր Twitter-յան էջում գրել է, որ այդ պահին ձերբակալում են իրեն և իր գործընկերներին, այն բանի համար, թե իրենք «ցանկացել են լուսաբանել քրդերի բողոքի ցույցերը»:

Գերմանիայի ԱԳՆ ներկայացուցիչն այդ մասին հանդես է եկել հայտարարությամբ` ասելով, որ Անկարայում գերմանական դեսպանատունն աշխատում է իրավիճակի պարզաբանման ուղղությամբ, մասնավորապես` կապ է պահվում ինչպես Գերմանիայի քաղաքացիների, այնպես էլ իրավասու գերատեսչությունների հետ։