Ակցիա՝ ընդդեմ ՄՄ-ի. լրագրողներն ու ոստիկաններն ակցիայի մասնակիցներից շատ են

Այսօր մի խումբ քաղաքացիներ բողոքի ակցիա են իրականացնում Ազատության հրապարակում` իրենց դժգոհությունն արտահայտելով Սերժ Սարգսյանի` մեկ տարի առաջ կայացրած` ՄՄ-ին անդամակցելու որոշման դեմ:

Ակցիային մասնակցում են ժուռնալիստների «Ասպարեզ» ակումբի ղեկավար Լևոն Բարսեղյանը, Երևանի ավագանու անդամ Դավիթ Սանասարյանը, ակտիվիստ Վրեժ Զատիկյանը և ևս մի քանի հոգի: Ուշագրավ է, որ ոստիկանների եւ լրագրողների թիվն ակցիայի մասնակիցների թվից ավելի մեծ է:

Ակտիվիստ Վրեժ Զատիկյանը նշեց, որ իրենք այստեղ հավաքվել են` ևս մեկ անգամ հիշեցնելու իրենց վերաբերմունքը ՄՄ-ին միանալու որոշման նկատմամբ: Ըստ նրա` ակցիայի մասնակիցների սակավաթվությունը պայմանավորված է ամռան շոգ եղանակով:

Դավիթ Սանասարյան էլ պատճառաբանեց, որ այսօր աշխատանքային օր է, և ակցիան աշխատանքային ժամին է իրականացվում: Նա Yerkir.am-ի լրագրողին հայտնեց, որ նախապես որոշել էին բողոքի երթով քայլել դեպի կառավարության շենք, սակայն, քանի որ Մեդվեդևը չի գալու Հայաստան, ամենայն հավանականությամբ, կշարժվեն Բաղրամյան 26-ի ուղղությամբ: