Արթուր Միրանյանը հանդես կգա Հայաստանի հավաքականներում

Հայտնի է, որ Դոնեցկի «Շախտյոր»-ի հայ կիսապաշտպան Արթուր Միրանյանը ցանկություն էր հայտնել հանդես գալու Հայաստանի դրոշի ներքո և համապատասխան հայտ էր ներկայացրել ՖԻՖԱ: Նախկինում Միրանյանը հրավիրվել է Ուկրաինայի մինչև 19 ու մինչև 17 տարեկանների հավաքականներ և հանդես է եկել այդ թիմերի կազմում:

ՖԻՖԱ-ն որոշում է կայացրել՝ բավարարել 18-ամյա ֆուտբոլիստի հայտը` թույլատրելով ֆուտբոլիստին հանդես գալ Հայաստանի տարբեր տարիքային հավաքականներում:

Հայաստանի ազգային հավաքականի մարզիչ Բեռնար Շալանդն արդեն հրավեր է ուղարկել Միրանյանին, ով այս պահին գտնվում է ՆՀՀ Մակեդոնիայում և պատրաստվում է պայմանագիր կնքել «Վարդար» ակումբի հետ. տեղեկացնում է ՀՖՖ պաշտոնական կայքը: