Քաղաքապետը գլխուղեղի սալջարդ է ստացել, մյուսի ողնաշարն է վնասվել, իսկ երրորդի ոտքը կոտրվել է

«Էրեբունի» բժշկական կենտրոնի փոխտնօրեն Միքայել Մանուկյանը քիչ առաջ Արցախում ականի պայթյունից վիրավորվածների առողջության մասին տեղեկություն է տրամադրել:

Ինչպես հիվանդանոցից տեղեկացնում է Yerkir.am-ի թղթակիցը, ըստ հիվանդանոցի փոխտնօրենի՝ երեք վիրավորներն էլ այժմ գտնվում են վերակենդանացման բաժանմունքում, նրանց վիճակը գնահատվում է կայուն ծանր, կյանքին վտանգ չի սպառնում:

Մանուկյանը հայտնել է նաեւ, որ երեքն էլ բազմաթիվ վնասվածքներ ունեն, հիվանդներից մեկի ոտքն է կոտրված, մյուսի ողնաշարն է վնասվել, իսկ ահա Արմավիրի քաղաքապետ Ռուբեն Խլղաթյանը ստացել է գլխուղեղի սալջարդ: Առաջիկա ժամերին կվիրահատեն քաղաքապետի վնասված մատը: Ինչ վերաբերում է ողնաշարը վնասած վիրավորին, հիվանդանոցի փոխտնօրենը հավաստիացրել է, որ նա հաշմանդամ չի դառնա, կքայլի, մասնագետներն ամեն ինչ կանեն նրա եւ մյուսների արագ ապաքինման համար: