Վարչապետը հանձնարարել է Վազաշեն-Պառավաքար ավտոճանապարհը շահագործման հանձնել մինչև օգոստոսի վերջը

Տավուշի սահմանամերձ գոտում գտնվող Վազաշեն-Պառավաքար այլընտրանքային ավտոճանապարհի շինարարական աշխատանքները փոքր-ինչ կերկարաձգվեն անձրևների և թշնամու կողմից հրադադարի ռեժիմը պարբերաբար խախտելու պատճառով:

Վարչապետ Հովիկ Աբրահամյանն այսօր ծանոթացել է ավտոճանապարհի կառուցման աշխատանքների ընթացքին և հանձնարարել, որ ճանապարհահատվածն ամբողջովին շահագործման հանձնվի մինչև օգոստոսի վերջ:

Ճանապարհի հողային աշխատանքների 90 տոկոսն արդեն ամբողջությամբ ավարտված է, մոտ 250 մետր երկարությամբ հատվածում կառուցվում է 5-10 մետր բարձրությամբ պատ, որը թույլ չի տա, որ ճանապարհը տեսանելի լինի Ադրբեջանի դիպուկահարներին:

Այլընտրանքային ավտոճանապարհի երկարությունը 3,2 կմ է, այն կառուցվում է անվտանգության նկատառումներով, քանի որ ներկայում շահագործվող ճանապարհը գտնվում է թշնամու կրակի հասանելիության գոտում: