ԵԱՀԿ ԽՎ` Բաքվի հռչակագրում ներառված են հայկական պատվիրակության բոլոր առաջարկությունները

Այսօր ավարտվեց ԵԱՀԿ Խորհրդարանական վեհաժողովի 23-րդ տարեկան նստաշրջանը, որն անցկացվում էր Բաքվում: Հայաստանյան պատվիրակության անդամ, ԱԺ ՀՅԴ խմբակցության քարտուղար Աղվան Վարդանյանը Yerkir.am-ի հետ զրույցում նշեց, որ արդեն ընդունվեց վեհաժողովի ամփոփիչ` Բաքվի հռչակագիրը, որում ընդգրկվել են հայկական պատվիրակության բոլոր` նախկինում արված ու ընդունված առաջարկությունները:

Նա տեղեկացրեց, որ հռչակագրում մի քանի կետեր կային մարդու իրավունքների վերաբերյալ եւ այլն, որոնց Ադրբեջանը դեմ էր, բայց այդ կետերն էլ մնացին:

«Մեր առաջարկությունները կոմիտեների արձանագրություններիում նշված բոլոր առաջարկություններն են, որովհետև կոմիտեներում ընդունված արձանագրությունները վերջում մտնում են հռչակագրի մեջ: Իհարկե, կարող է այնտեղ ինչ-որ բան փոխված լինել, բայց ամեն ինչ նույնությամբ մնացել էր, ու այդ իմաստով ամեն ինչ նորմալ էր, հատուկ բան չկա: Ավարտեցինք` մեր սուրը փառքով դրեցինք պատյան: Սովորական ԵԱՀԿ լիակատար տարեկան նստաշրջան էր»,- նշեց Աղվան Վարդանյանը:

Հայկական պատվիրակությունը 1 ժամից արդեն կմեկնի օդանավակայան` Հայաստան վերադառնալու համար: