Հայաստանը պատրաստ է աջակցել Երուսաղեմի հայոց պատրիարքությանը. Սերժ Սարգսյան

Նախագահ Սերժ Սարգսյանն այսօր ընդունել է Երուսաղեմի հայոց պատրիարք ամենապատիվ Տ. Նուրհան արքեպիսկոպոս Մանուկյանին:

Նախագահը և պատրիարքը զրուցել են ազգային-եկեղեցական հարցերի, Հայաստանի և Հայ առաքելական սուրբ եկեղեցու միջև հաստատված սերտ համագործակցության, Երուսաղեմի հայոց պատրիարքության գործունեության, ինչպես նաև աշխարհասփյուռ հայ ժողովրդի կյանքում հայոց եկեղեցու դերի և նշանակության մասին:

Սերժ Սարգսյանը մեծապես կարևորել է սուրբ հողում բազմադարյա պատմություն և հարուստ ավանդույթ ունեցող Երուսաղեմի նվիրապետական աթոռի գործունեությունը հայոց հոգևոր և մշակութային ժառանգությունը պահպանելու և այն գալիք սերունդներին փոխանցելու գործում:

Հաշվի առնելով Հայաստանյայց առաքելական սուրբ եկեղեցու առաքելությունը հայ ժողովրդի հոգևոր կյանքում՝ նախագահը վստահեցրել է, որ Հայաստանը պատրաստ է ըստ անհրաժեշտության աջակցելու Երուսաղեմի հայոց պատրիարքությանը իր այդ կարևորագույն առաքելության իրականացման ճանապարհին: