Սոցապ նախարարը տեղյակ չէ՞ ճնշումներից

ՀՀ աշխատանքի և սոցիալական հարցերի նախարար Արտեմ Ասատրյանի խոսքով` արդեն մեկ ամիս է, ինչ գործողության մեջ է դրվել քաղաքացիների կամաարտահայտության իրավունքը, որ նրանք կարող են հրաժարվել կուտակային համակարգից, իսկ նոր օրենքի ամբողջական փաթեթը կառավարությունն առաջիկայում ներկայացնելու է Ազգային ժողովի ուշադրությանը:

Թե ի՞նչ ժամկետներում է կառավարությունը ներկայացնելու նոր օրենքը, Արտեմ Ասատրյանը դժվարացավ ասել: «Մենք ցանկանում ենք ներկայացնել մինչև հուլիսի 1-ը»,- ասաց նա:

Հարցին` արդյո՞ք թափանցիկ է գործելու կառավարությունը, որպեսզի հանրությունը նախապես տեղեկանա, թե ինչ օրենք է ներկայացվելու, նախարարը պատասխանեց. «Կներկայացնենք, կներկայացնենք, քննարկումներ կլինեն»:

Ինչ վերաբերում է կուտակայինից հրաժարվելու համար աշխատողների վրա տարատեսակ ճնշումների վերաբերյալ ահազանգերին, նախարարը զարմացավ. «Դուք գիտե՞ք նման դեպքեր, տվյալներ կարո՞ղ եք ներկայացնել: Եթե կան կոնկրետ տվյալներ, ներկայացրեք պատկան մարմիններին, իսկ աշխատանքի և սոցիալական հարցերի նախարարությունը նման գործառույթներ չունի»: