«Վերնիսաժ»-ի գործով մեղադրյալներից մեկի խափանման միջոցը կիրառելու մասին որոշումը մեկ ժամվա ընթացքում կընդունվի

«Վերնիսաժի» գործով մեղադրյալ Ներսես Մելքոնյանի դեմ խափանման միջոց կիրառելու վերաբերյալ առաջիկա մեկ ժամվա ընթացքում որոշում կընդունվի: Այս մասին Yerkir.am-ին հայտնեց Ներսեսի փաստաբան Արմեն Խաչատրյանը:

Նա նշեց, որ ընդամենը րոպեներ առաջ է դատարանն անցել խորհրդակցական սենյակ: Քննիչի միջնորդությունը քննվում է Կենտրոն և Նորք-Մարաշ վարչական շրջանների ընդհանուր իրավասության դատարանում:

Հիշեցնենք, որ մոտ երկու օր առաջ ձերբակալվել էր մայիսի 17-ին «Վերնիսաժի» մոտ արձակված կրակոցներից վիրավորված Ներսես Մելքոնյանը (նույն Նորայր Հարությունյանը, որի անունը ի սկզբանե սխալ էին հայտնել լրատվամիջոցներին):

Այսօր` ժամը 15:00-ին, ավարտվել է նրա ձերբակալության 72 ժամը: Դատարանի որոշումից հետո պարզ կլինի, թե նա կալանքի տակ կվերցվի՞, թե՞ ոչ:

Ներսես Մելքոնյանին մեղադրանք է ներկայացվել Քրեական օրենսգրքի 258-րդ հոդվածի 3-րդ մասի 1-ին կետի հատկանիշներով (մի խումբ անձանց կողմից խուլիգանություն կատարելը):