Կառավարությունը 37 միլիոն դոլար վարկ է ուզում վերցնել

ՀՀ կառավարությունը պատրաստվում է էլեկտրաէներգիայի հաղորդման ցանցի վերակառուցման համար 37 միլիոն դոլար վարկ վերցնել Ասիական զարգացման բանկից:

Վարչապետ Հովիկ Աբրահամյանի` հունիսի 4-ի 514-Ա որոշումից տեղեկանում ենք, որ Ասիական զարգացման բանկի պատվիրակության հետ էլեկտրաէներգիայի հաղորդման ցանցի վերակառուցման ծրագրի շրջանակներում Ասիական զարգացման բանկի կողմից առաջարկվող 37 մլն ԱՄՆ-ի դոլար վարկի շուրջ Երևանում բանակցություններ վարելու նպատակով պետք է ստեղծվի բանակցային խումբ, որը կգլխավորի ՀՀ էներգետիկայի և բնական պաշարների նախարար Երվանդ Զախարյանը:

Ըստ որոշման` բանակցային խմբի ղեկավարը լիազորվում է Հայաստանի Հանրապետության կառավարության անունից քննարկել էլեկտրաէներգիայի հաղորդման ցանցի վերակառուցման ծրագրի վարկավորման դրույթներն ու պայմանները, ինչպես սահմանված է վարկային համաձայնագրի նախագծով, և բանակցությունների արդյունքում ստորագրել համապատասխան արձանագրություն: