Դավիթ Հարությունյանը համաձայն է Արծվիկ Մինասյանի հետ` կառավարության անդամները պետք է զգույշ արտահայտվեն

Yerkir.am-ի հետ զրույցում ՀՀ կառավարության աշխատակազմի ղեկավար-նախարար Դավիթ Հարությունյանն անդրադարձել է ԱԺ ՀՅԴ պատգամավոր Արծվիկ Մինասյանի այն հայտարարությանը, որ ԱԺ ամբիոնից կառավարության անդամներն ու պատգամավորները պետք է զգույշ խոսեն կենսաթոշակային համակարգի մասին, հատկապես` երբ կիրառում են «պարտադիր կուտակային»  բառակապակցությունը:

Դավիթ Հարությունյանը նշեց. «Հասկանում եմ Արծվիկ Մինասյանի ասածը: Միշտ չէ, որ կարող եմ կիսել, բայց այն, որ կառավարության անդամները պետք է զգույշ լինեն իրենց արտահայտություններում, դրանում վստահ եմ: Խնդիրն էլ ինքնին բարդ է, և դրա լուծումն այդքան մակերեսային չէ, որ մենք կարողանանք շատ հստակ, ճշգրիտ պատասխաններ տալ: Մենք ինքներս դեռևս չենք եկել վերջնական մոդելին և անընդհատ նորանոր մոտեցումներ ենք քննարկում»: